2020-2021 ikasturtea

Ezohiko ikasturtea izan da, hala ere, ez gara besoak uztarturik geratu eta ikasturte ederra pasa dugu elkarrekin. Hasieratik aritu gara buru belarri lanean eta egunero ikasi dugu zerbait. Harro egoteko moduko emaitzak lortu ditugu, arlo akademikoan ez ezik, baita hortik kanpo ere! Natura behatuz eta aztertuz, harekiko lotuta jarraitu dugu, kantuan eta dantzan aritu gara eta proiektu berriei ekin. 

Ondorengo bideoan 2020-2021 ikasturtearen errepasoa egin dugu. Ea zuen gustukoa den!

Egoera arintzen doala dirudien arren, eta datorren ikasturteari begira lanean ari bagara ere, ezegonkortasun maila altua da oraindik eta horregatik ezin dugu aurreikuspen handiegirik egin. Hori dela eta, gogorarazi nahi dizuegu gardentasunaren alde egiten jarraituko dugula gure arteko komunikazioa egonkor mantendu dadin. Iaz bezala, abuztuaren bukaeran jakinaraziko dizkizuegu hartuko diren erabakiak. Bien bitartean, uda ederra pasa eta zaindu zaitezte!

Ibilbide baten amaiera

Bukatu dute DBH 4. maila eta beste bidaia bati ekingo diote 2020-2021 promozioko ikasleek. Ezohiko ikasturte batean egokitu zaie agurra, segurtasun distantzia eta musukoak nagusitu diren garaian hain zuzen, baina argi utzi nahi diegu, ospatu gabe utzi dituztenak ospatzeko -edo beste edozertarako-, beso zabalik hartuko ditugula etorkizunean. 

Asko txiki-txikitatik hazi eta hezi dira Herri Ametsa ikastolan, beste batzuk beranduago batu dira eta, egun, gure familia handiaren parte dira denak.

Karlos Ibarzabal zuzendariak gidatutako agur ekitaldian euren ibilbidea laburtzen duen argazki eta bideo bilduma ikusi dute eta opari gisa jaso, beste oroigarri batekin batera. Ondorengo bideoak aipatu saio berezia laburtzen du.

Zorterik onena opa dizuegu, zorionak!

Etorkizuneko loreak

Ikastolako azken egunean zenbat eta zenbat emozio azaleratzen diren. Ezinbestean, atzera begiratzen dugu, baina batez ere zain dugun udan dugu begirada iltzatuta; etorkizunean. 

LH 5. maila bukatu berri duten Amets, Indara eta Maddik egin bezala, amesteko gonbita luzatu nahi dizugu bideo honen bitartez: nolakoa izango da nire bizitza 30 urte barru? Edo hain urrutira joan beharrik gabe, nolakoak izango dira nire oporrak? Zer egitea gustatuko litzaidake? 

Etorkizunean, irailean, ikusiko dugu elkar. Bitartean, amestu, izan ausart eta gozatu!

Kidetza proiektua

DBH 4ko eta LH 1eko ikasleen arteko proiektua da Kidetza. Iazko ikasturteko itxialdian zehar identifikatutako beharretatik jaio zen eta aurtengo ikasturtean praktikan jarri da; Lehen Hezkuntzako txikienek bidelagun izan dituzte ikastolako ikasle helduenak.

Covid 19ak eragindako pandemiak ekarpen positiboak ere egin dizkigula islatu nahi dugu erreportaje honetan. Horien artean, Kidetza proiektua. Izan ere, muturreko egoeren aurrean berrasmatu behar izaten dugula eta, zenbaitetan geratzeko modukoak diren ekimenak sortzen dira. Horrez gain, ederki islatzen du ikastolako leloa ekimen honek. Ikastola txikia izanik ere, familia handia gara. 

Musika Jaialdia 2020-2021 bideoan

Emanaldi seinalatua izaten da gurean Musika Jaialdia, jende ugari biltzen gara ikasleen musikari dohainez gozatzera eta ederki pasatzen dugu! 

Aurten, ekitaldi jendetsurik egin ezin dugunez, bideo bidezko emanaldia prestatu dugu haurreskolatik hasi eta LH 6. mailarainoko ikasleen parte hartzearekin. 

Haur Hezkuntzako ikasleak kantuan aritu dira, LH 1, 2 eta 3.mailakoek, gelaka, haiek aukeratutako kanta baten koreografia prestatu dute eta, azkenik, LH 4, 5 eta 6. mailakoak, gustuko doinu bat oinarri hartuta, letragile lanetan aritu dira, gero abesteko.  

Aldez edo moldez, kantuan eta dantzan jarraituko dugu! Igo bolumena, sakatu play eta has dadila emanaldia!

Txerto emozionala

Nerea Mendizabal Komunikazio Ez Bortitzeko hezitzaileak haur eta gazteen bidelagun diren guraso eta hezitzaileei zuzenduriko hitzaldia eskaini zuen online maiatzaren 11n. Parte hartze zabala izan zuen eta oso balorazio positiboa egin zuten bertaratutakoek. Gaurtik aurrera, Herri Ametsako Youtubeko kanaleko Hitzaldiak zerrendan, eskuragarri dago saioaren grabazioa interesatu ororentzat. 

Txerto Emozionala du izenburu hizketaldiak, COVID-19ak eragindako osasun larrialdiak gure bizitzetan eragin duen emozio eztandan jartzen baitu fokua. Nola zaindu norbera eta besteak, ziurgabetasuna eta gatazkak bizirik daudenean? Bada, emozioak entzunaz eta besteenganako begirunea landuz, bidea argi dezakegu, bakoitzak bere moduan betiere. 

Mendizabalek, Komunikazio ez Bortitzaren ikuspegitik eta galderak egiteko aukera eskainiz, “beldurraren pandemian” konfiantza, poza, itxaropena eta maitasuna kutsatzeko hainbat gako eskaini ditu ikusgai duzun hitzaldian.

Ekaineko emozioa: ausardia

Ikasturtea bukatzear da eta beste hainbeste abentura hastear. Azken horiengan jarriko dugu fokua ikasturteko azken Emozioen Erronkan. Ekaineko emozioa AUSARDIA izango da, aurrera indartsu egiten laguntzen digun emozioa.

Oraingo honetan zuen etorkizun labur, ertain edo urruneko ilusioen berri jakin nahi dugu. Zertan lagunduko zaituzte ausardiak udan? Eta datorren ikasturteari begira? Kezkatzen zaituzten zerbait al dago? Eta irrikaz espero duzuenik?

Bidali zuen etorkizuneko erronkak Helbide elektroniko hau spambot-etatik babestuta dago. JavaScript gaituta izan behar duzu ikusi ahal izateko. helbidera edo partekatu sare sozialetan #HerriAmetsaAusart traola erabilita. Jasotako erantzunen artean ausardiaz betetako bilduma osatuko dugu!

Tokiko natur zaindari gara

Herri Ametsa ikastola “tokiko natur zaindaria” da, urtero inguruko eremuan hondakin bilketa egiteko konpromisoa hartzen baitu. Aurten Plastifisharen Kostera proiektuan parte hartu du, zeinak helburu duen herritarrak ingurumenaren kontserbazio aktiboan inplikatzea. 

Mater museoak, Gipuzkoako Aldundiak eta Ternuak antolatutako ekimenaren lehen edizio honetan Gipuzkoako 6 arro nagusien inguruko 10 udalerritako 2023 pertsonek hartu dute parte. Egindako 45 bilketen artean, 1800kg hondakin jaso dira, Bigarren Hezkuntzako 8 ikastetxeetako gazteek sortutako 112 proiektu garatu dira, herritarren 4 tokiko ekopatruila sortu dira prestakuntza tailerren ondorioz eta 6 sentsibilizazio tailer ere egin dira Pasaiako badiako 10 itsas eragileekin.

Amaiera ekitaldia Donostiako Kursaal jauregian egin zen eta bertan izan zen Herri Ametsako ordezkaritza. “Tokiko natur zaindari” eskola aintzatespena eman ziguten, hori posible egin duen komunitatearen lana aitortuz.

Izan ere, Herri Ametsan, gure ingurua garbitzeko irteerak antolatu ohi ditugu. Goiko irudia ikastola ondoan dagoen Ilurgita edo Murgita senadira jeitsi ginenekoa da. Egun bikaina izan zen, senadiko zaborra jasotzen lagundu ziguten guraso batzuen laguntza izateaz gain, uraren kalitatea, fauna, flora, gizakien arrastorik ba ote zegoen, etab. neurtzeko azterketak burutu genituen. 

Plastifishaz gehiago jakiteko, egin klik hemen.

Bizitzak salbatzen jakitearen garrantzia

Maiatzaren 27a, European Society for Emergency Medicine (EUSEM)-k bultzatuta, Larrialdietako Medikuntzaren Eguna da eta SEMES EUSKADI elkartetik larrialdietako espezialitatea aldarrikatzeko baliatu dute eguna Zure segurtasuna, gure espezialitatea lelopean. Izan ere, Europa mailan, Iberiar Penintsulako herrialdeak dira larrialdi eta emergientziako espezialitatea ez duten bakarrak. 

Testuinguru horretan, HHko ikasleek lehen sorospenen inguruko oinarrizko ikasketak jaso dituzte DYAko langile eta guraso den Roi Vega eta Cristinaren eskutik. 

112 telefonoa memorian ondo gorde eta bihotz-masajea nola egin ikasteaz gain, honako bideoa ere ikusi dute saioan.

Mendiola Urmaela bidelagun

Urmaela ere badugu Herri Ametsako inguru paregabean; Mendiola Urmaela. 

Sekulako altxorra da hainbat alderditatik erreparatuta, izan ere, naturarentzat onuragarria izateaz gain, baliabide didaktiko gisa erabiltzeko oso aproposa da. LH 5. mailako Oihane Alkorta irakasleak adierazi bezala, “laborategi natural txiki bat ikastolan”. Ikasleei esperimentazio bidez ikasteko aukera eskaintzen die Urmaelak, gainera, bizi dugun bizitza azkar eta bat-batekoan, naturaren erritmora egokituz, lasaitasunez behatu ahal izatea aberasgarria da. Naroa Lopez eta Zuriñe Arbina ikasleek ederki adierazi dizkigute orain arte ikasitakoak! 

Urmaela Eskolan 

Aranzadi Zientzia elkarteak Eskoletako Urmaelen Sarea osatu du, eskola inguruan urmaela edo putzua duten eta eremu hori erabilera didaktikorako erabiltzen duten Euskal Herriko ikastetxeen sarea alegia eta Herri Ametsa ikastola bertako partaide da.

Book Trailer lehiaketan finalista

Galtzagorri Elkarteak, Gipuzkoako Foru Aldundiarekin lankidetzan, 9. urtez Liburu Gaztea book trailer lehiaketa antolatu du eta 250 lanetik gora aurkeztu diren sariketan, Herri Ametsa ikastolako DBH1A gelako bi talde finalista izan dira. Gainontzeko sailkatuen eta irabazleen berri jakiteko, egin klik hemen.

Irakurzaletasuna sustatzea helburu, DBHko ikasleek Elkarteak proposatutako liburuak irakurri eta book trailer iradokitzaile eta originalak sortu behar dituzte. Ondoren, epaimahaiak erabakitzen du zein book trailer izan den onena.

Aurten proposatutako liburuak hauek izan dira:

- Wonder, mutiko miragarria (2012). R. J. Palacio eta Tad Carpenter

- Coraline (2002). Neil Gaiman eta Dave McKean

- Momo (1973). Michael Ende

- Ezezagunak (2018). David Lozano

Finalera iritsi diren bi taldeek, Wonder, mutiko miragarria eta Coraline liburuak oinarri hartuta, HIRU EGUNAK (Nahia Graña, Danae Laumon eta Aiert Valdivia) eta ABDUZKAN (Alazne Martinez, Saioa Franco, Nahia Rico eta Oihan Sabando) izeneko book trailerrak sortu dituzte. Harro gaude gure ikasleek egin duten lan bikainarekin, zorionak!

Tabakalerako Kutxa Kultur Plazan izan zen sari banaketa ekitaldia eta gure ikasleak ere bertan izan ziren. Ikusi gabe geratu bazinen edo berriz ikusi nahi baduzu, egin klik hemen.

Donostiako Udalari eskera

“Berdeak gida beza auzoen sorrera” aldarrikatu diote Donostiako Udalari gure LH eta DBHko ikasleek. 

Ikasturtero bezala, aurten ere Agenda 2030i dagokion helburua landu dute geletan. Donostia inguruko lehorreko ekosistemei buruz hausnartzeko beta izan dute, basoen inguruan aritzekoa, alegia. Ikasturte amaierarekin batera, iritsi da Udalari gure eskaerak bideratzeko garaia. Bizi dugun osasun-egoeraren ondorioz, baina, aurtengo Udal Foroak ez du ohiko formatua izan; ikastetxeetako ordezkariak ezin izan dira ohi bezala Udaletxera joan beren konpromiso eta eskariak aurkeztera. Aurten, on-line egin da Eskolen Arteko Foroa eta bertan, bozketa bidez, udalari egiteko eskaera esanguratsuenak aukeratu. Eskaera horien guztien artean, gure ikasleek egindako bat hautatu da. Horregatik, eskaera eta egindako lana Udalari ezagutarazteko bideoa grabatu dugu. 

Basoen biziraupenaren aldeko sentsibilizazio errimak sortu ditu Patruila Berdea taldeak eta Hugo Elorza, Alazne Martinez, Eñaut Vicente eta Nahia Barrutia ikasleek rapera ekarritako bertsoak lau haizetara zabaldu dituzte gure inguruko basoetan.

Erleen Nazioarteko Eguna

Polinizatzaileen garrantzia, jasaten dituzten mehatxuak eta garapen jasangarriari egiten dioten ekarpena ezagutarazteko, Nazio Batuen Erakundeak  (NBE) Erlearen Nazioarteko Eguna izendatu zuen maiatzaren 20a.

Erleak aspaldidanik ditu lagun Bidatz Sasiainek (Gipuzkoako Erlezain Elkarteko kideak), eta beraiei buruzko saioa eskeini die gure 5 urteko lagunei. Erleen ezagutzarako sentsibilizazio jardunaldian, erleek sorturiko argizariarekin kandelak sortu, euren eztia dastatu eta, gainera, aurrez aurre erleak ikusi ahal izan dituzte gure txikienek. Argazki gehiago ikusteko, klikatu hemen.

Adituak, ikastaroak eskaintzeaz gain, Osabi Naturala deituriko kosmetika eta produktu naturalen laborategia du Tolosan. Etxeko erlauntzetako produktuak eta landare jatorriko osagai naturalak maitasun eta mimo handiz zaindu ondoren, aukeratutako osagaiak artisau moduan eraldatzen ditu. Tolosa Bizziz (Tolosa), Kool Studio (Lasarte) edota Aikur Natur dendan (Alegi) topatuko dituzu Osabi Naturala laborategian ekoitzitako produktuak, hala nola: propolia, eztia, desodorantea, eskutarako krema...

Maiatzeko emozioa: maitemina

Nahigabea eta gorrotoa bezalako emozioak atzean utzita, maiteminaren txanda izango da maiatzean. 

Zer da eta zer ez da maitemina? Galdera horren bueltan arituko gara urteko bostgarren hilabetean zehar. Izan ere, hasiera batean sakona bezain polita dirudiena, gaiztotu ere egin daiteke eta horregatik nahi izan dugu azpimarra harreman osasuntsuetan jarri. Maiteminak, beste emozio guztiek bezalaxe, osasuntsua izan behar duelako. 

Baina zer da maitemin edo harreman osasuntsu bat? Galdera horri erantzuna eman nahi diogu zuen parte hartzearen bidez. Hainbat modutan gauzatuko dugu parte hartzea. 

Batetik, sareen bidez. Nahi duen orori zuzenduta egongo da eta maitemina islatzen duen uneren bat irudikatuko duen marrazki, argazki, bideo zein testu bat bidaltzeko edo partekatzeko eskatuko dizuegu. Partekatzeko, #herriametsamaiteminduta da hilabete honetarako sortu dugun traola eta zuen ekarpenak bidaltzeko Helbide elektroniko hau spambot-etatik babestuta dago. JavaScript gaituta izan behar duzu ikusi ahal izateko. helbidea erabil dezakezue. 

Bestetik, ikasgeletan. DBHko ikasleekin egingo dugu maiteminaren bueltako hausnarketa. Nerabezaroan pisu handia duen emozioa dela kontuan hartuta, garrantzitsua iruditu zaigu gela barruan ere kontuan hartzea. 

Hilabete amaieran, ekarpen guztiak batu eta aztertu ondoren argitaratuko dugu emaitza. Gogoan izan, zuen parte hartzea zenbat eta handiagoa izan, orduan eta nabarmenagoa izango dela sortuko dugun kontzientziazioa ere!

Bertsoak gorrotoari

Apirilean zehar gorrotoari heldu diogu Emozioen Erronkan eta, nahiz eta ez den erraza horren inguruan hausnartu eta kudeaketa positibo bat egitea, doinua jartzera ere animatu gara.

LH6ko ikasleek bertsolaritza saioetan zuek bidalitako argazkiak abiapuntutzat hartu eta honako bertso ederrak sortu dituzte:

Koldo Mitxelena literatura lehiaketa 2021

Donostiako ikastetxeetan ikasten ari diren 8-18 urte bitarteko haur eta gazteei zuzendutako literatura lehiaketan Herri Ametsako sei ikaslek aipamena eskuratu dute eta bi izan dira sarituak:

Aipatuak:

Elaia Caballero Matilla LH 3 (Neskatika ausarta, Komikia) 

Uxue Escudero Redondo LH 6 (Konfinamendua, Komikia)

Ander Santiago Sanchez LH 4 (Pepe eta Zero: exploradoreak, Komikia)

Unax Arroniz Burgos DBH 2 (Astronauta, Mikroipuina)

Maya Civantos Etxenike DBH 2 (Erloju misteriotsua, Mikroipuina)

Onintza de Bourthoumieu Gonzalez DBH 4 (Perfektu, Komikia)

Sarituak:

Alazne Martinez Perez DBH 1 (Zer ote da?, Mikroipuina)

Leire Abedul Cano DBH 2 (Egizu Hegan!, Mikroipuina)

Yolanda Arrieta, Beñat Gaztelumendi, Ana Malagon, Iñaki Martiarena “Mattin”, Inazio Mujika eta Arantxa Urretabizkaiak osatu dute epaimahaia. 

32. edizio hau ere osasun egoerak baldintzatua egongo denez, sari-banaketan aforoa murriztu dute eta saridunak bakarrik egon ahal izango dira ekitaldian alkate, epaimahai, musikari eta aurkezlearekin batera.

Maiatzaren 20ean, osteguna, arratsaldeko 18:30ean egingo da Udaletxeko pleno aretoan. Familiek eta eskolek streaming bidez jarraitzeko aukera izango dute eta gerora, beti bezala, bideoa egongo da zintzilik Euskara Zerbitzuaren orrian.

Sarituak

Leire Abedul. DBH 2.maila

Ez zuen sariduna izatea espero eta uste du “ohikoa ez den gai bat lantzeagatik” hautatu dutela haren lana. “Ezberdina” den mutil bakarti baten istorioa kontatu du Egizu Hegan! izeneko mikroiopuinean; “besteekin harremantzea kosta egiten zaiolako gertatuko zaio gertatuko zaiona”. Ez dugu gehiago kontatuko. 

Leirek lan honekin islatu nahi izan duena da “denak ez garela berdinak eta bakartia izateagatik ez dela inor munstrotzat hartu behar, denak baikara pertsonak”.

Leireren mikroipuina irakurtzeko egin klik hemen. 

Alazne Martinez. DBH 1. maila

Alaznerentzat ere sorpresa izan da saridunen artean egotea eta, bere kasuan, epahimahaiari gehien gustatu zaiona amaiera izan dela pentsatzen du. Saritutako mikroipuinean neska batengan jarri du fokua Alaznek, “logela beltz batean dagoen bitartean gertatzen zaiona kontatuko du”. Zer ote da?, hala dio izenburuak.

Alaznek kontatu digu gustatzen zaiola irakurtzea eta filmak edo telesailak ikustea. “Liburu bat gustoko badut, segituan bukatu ohi dut”, aitortu digu. Generoari erreparatuta, komediak, erromantikoak edota akziozko filmak gustatzen zaizkio. Liburuen kasuan, misteriozkoak gustatzen zaizkio gehien. Idaztea ere maite du Alaznek, “barrua husteko” balio diola kontatu digu eta “lotara joan aurretik” idatzi ohi duela etxean; “batzuetan irakurri eta bestetan idatzi egiten dut”. 

Alazneren mikroipuina irakurtzeko egin klik hemen.

Kilometroak 2021 arropa salmenta

Abian da Gipuzkoako ikastolen aldeko Kilometroak jaiaren arropa salmenta kanpaina. Aurten, 15 eguneko epean bakarrik erosi ahal izango da; apirilaren 28tik maiatzaren 10era, hain zuzen. Ez da arropa erosteko beste aukerarik izango. Erosketa egiteko jo esteka honetara: kilometroak.eus/denda eta norberak bere ikastolan jasoko du egin duen eskaria.

Batera, bagara, bat gara 

Hori da 2021eko ospakizunaren leloa. Batera; Ikastolen batasuna adierazten du eta ez soilik Gipuzkoakoena, EH osokoena ere bai baizik. Bagara; gure izatearen aldarrikapena, eta batasunaren ezinbestekotasuna ere adierazten du. Batera bagara, bestela ez gara. Bat gara; Gure izatearen osotasuna eta zatiezintasuna adierazten du. Herri bat gara, euskara gara, komunitate bat gara, Euskal Herri osorako hezkuntza proiektu bat gara.

Goierri eskualdeko hiru ikastolek antolatuko dute aurtengo Kilometroak jaia: Ordiziako Jakintzak, Beasaingo Andramendik eta Lazkaoko San Benitok. Hori bai, urriaren 3an ospatuko den egun handian ezin izango da ohiko festa erraldoirik egin. Nahiz eta gurea den auzolan eta auto-antolakuntzarako tradizioari eutsiz, Gipuzkoako Ikastolok aurtengo Kilometroak aurrera ateratzeko konpromisoa izaten jarraitzen dugun.

Euskara eta euskal kulturari arreta berezia jarriko diote pandemia egoera honek baldintzatutako Kilometroak jaiean. Izan ere, konbentzituta gaude gure kulturak eta hizkuntzak plazak behar dituela. Adin guztietako euskaldunek beteko dituzten plazak eta 2021eko Kilometroak horietako bat izango da.

Bi kobazulo ipuinaren irakurketa bateratua

Uxue Alberdik idatzitako eta Antton Olariagak ilustratutako Bi Kobazulo ipuinaren irakurketa bateratua egin dute gure ikasleek; HHtik hasi eta DBHra. 

Bi umeri buruzko ipuina da, non, era berean, gure beldurrei buruz hitz egiten duen modu fantastiko batean. Ipuin sinbolikoa izanagatik ere, abenturazko ipuin modura ere funtzionatzen du. 

Hauek dira irakurketan parte hartu duten ikasleen izen abizenak: Oihane Otzeta, Julia Lopez, Liher Fernandez, Lide Seges, Noel Chanca, Miru Berasategi, Erik Ibañez, Iraia Gonzalez, Izaro Segurola, Nahia Garcia, Mikel Castillo, Izar Trchel, Iñigo Zelaieta, Hiart Crespo, Daniela Lopez, Indara Sanchez, Iraia Barros, Aritz Azpiroz, June Marchan, Aiert Valdivia, Laia Etxeburua, Udane Martinez, Galder Marin, Lucia Dominguez, Iraia Roldán, Israel Hernandez, Iker Jimenez eta Sara Lopez. 

Euskal Dantza Plazara!

Herri Ametsa Ikastolak martxan jarri duen ekimena da Euskal Dantza Plazara! Euskara eta euskal kultura ditu ardatz eta apiriletik aurrera kurrikulumean txertatua egongo da. Hots, HH, LH eta DBHko ikasle guztiek hartuko dute parte i(ra)kasorduetan. Ez hori bakarrik, familiei eta interesa duen orori ere zuzenduta dago. 

Horretarako, txalentx bat jarri dugu martxan: ikasleek ikastolan ikasitako dantzak etxekoei erakutsi beharko dizkiete. Ondoren, familiakoekin batera dantzak ikasitakoan, nahi duenak bideo bat grabatu eta Helbide elektroniko hau spambot-etatik babestuta dago. JavaScript gaituta izan behar duzu ikusi ahal izateko. helbidera bidaliko du. Hartara, jasotako grabaketekin bideo eder bat sortu ahal izango dugu. 

Enekok lagunduko digu prozesu osoan zehar. Egin klik ondorengo bideoan Eneko bera eta txalentxaren nondik norakoak hobeto ezagutzeko.  

Bideo guztiak gure Youtubeko kanalean bilduko ditugu Euskal Dantza Plazara! izeneko zerrendan.

Apirileko emozioa: gorrotoa

Apirilarekin batera emozio berri baten hilabetea hasi dugu: GORROTOA. Hil honetan, bertso bidez landuko dugu sentimendu bortitz hau eta horretarako, zuen laguntza behar-beharrezkoa dugu. Oraingoan, gorrotoarekin lotzen duzuen objektu bat identifikatu eta haren argazki bat Helbide elektroniko hau spambot-etatik babestuta dago. JavaScript gaituta izan behar duzu ikusi ahal izateko. helbidera bidaltzeko eskatu nahi dizuegu. Hartara, gure LH-5. eta 6. mailako ikasleek hilabete honi itxiera bertsoa egiteko hizpidea izango dute.

Bestetik, orain arte bezala, gorrotoarekin lotutako zuen bizipenak elkarbanatu nahi izanez gero, erabili #herriametsagorrotoz traola sare sozialetan edota idatzi Helbide elektroniko hau spambot-etatik babestuta dago. JavaScript gaituta izan behar duzu ikusi ahal izateko. helbidera.

Hementxe uzten dizkizuegu LH 6. mailan emozio hau aurkezteko egindago lanketaren fruitua: